ಸುಮಾರು ಐವತ್ತೆರಡು ಎಕರೆಯಷ್ಟು ವಿಶಾಲವಾದ ಪ್ರದೇಶದ ನಡುವೆ ಇರುವ ಗೋರಖನಾಥ ದೇವಾಲಯ ನಗರದ ಪ್ರಮುಖ ಧಾರ್ಮಿಕ ಮತ್ತು ಪ್ರೇಕ್ಷಣೀಯ ಸ್ಥಳವಾಗಿದೆ. ಸಂತ ಗೋರಖನಾಥರು ಈ ಸ್ಥಳದಲ್ಲಿಯೇ ತಪಸ್ಸು ಮಾಡಿದ್ದರು ಎಂಬ ನಂಬಿಕೆಯ ಆಧಾರದಲ್ಲಿ ಅವರ ಭಕ್ತರು ಈ ಸ್ಥಳದಲ್ಲಿ ದೇವಾಲಯವನ್ನು ನಿರ್ಮಿಸಿದ್ದಾರೆ. ದೇವಾಲಯದ ಗರ್ಭಗುಡಿಯಲ್ಲಿ ಸಂತ ಗೋರಖನಾಥರನ್ನು ಶಿವನ ರೂಪದಲ್ಲಿ ವ್ಯಕ್ತಪಡಿಸಲಾಗಿದೆ. ದೇವಾಲಯದ ಪಕ್ಕದಲ್ಲಿರುವ ಮಾನಸ ಸರೋವರದಲ್ಲಿ ಭಕ್ತರಿಗೆ ಪವಿತ್ರವಾಗಿದೆ. ಇಲ್ಲಿ ಭಕ್ತರು ಧ್ಯಾನ ಹಾಗೂ ದೋಣಿವಿಹಾರದ ಮೂಲಕ ಧನ್ಯತೆಯನ್ನು ಅನುಭವಿಸುತ್ತಾರೆ. ಗೋರಖನಾಥರ ಹೆಸರಿನಲ್ಲಿ ನಿರ್ಮಿಸಿರುವ ಇನ್ನೊಂದು ದೇವಾಲಯ ನೇಪಾಳದಲ್ಲಿದೆ. *1
ಪ್ರತಿವರ್ಷ ಜನವರಿ 14ರಂದು ಪ್ರಾರಂಭವಾಗುವ ಮಕರ ಸಂಕ್ರಾಂತಿ ಸಮಯದಲ್ಲಿ ಒಂದು ತಿಂಗಳ ಕಾಲ "ಮಕರ ಸಂಕ್ರಾಂತಿ ಮೇಳ" ವನ್ನು ಆಯೋಜಿಸಲಾಗುತ್ತದೆ. ಈ ಅವಧಿಯಲ್ಲಿ ದೇಶವಿದೇಶಗಳಿಂದ ಲಕ್ಷಾಂತರ ಸಂಖ್ಯೆಯಲ್ಲಿ ಭಕ್ತರು ಆಗಮಿಸಿ ’ಖಿಚಡಿ’ ಖಾದ್ಯವನ್ನು ನೈವೇದ್ಯದ ರೂಪದಲ್ಲಿ ಅರ್ಪಿಸುತ್ತಾರೆ. ನೇಪಾಳದ ರಾಜರೂ ಕೆಲವು ಬಾರಿ ಈ ಮೇಳಕ್ಕೆ ಆಗಮಿಸಿದ್ದರು.