ನಾಗಾಲ್ಯಾಂಡ್ ವಿಜ್ಞಾನ ಕೇಂದ್ರವು "ಕ್ರಿಯೆಯ ಮೂಲಕ ವಿಜ್ಞಾನವನ್ನು ಕಾಣುವ" ಆಲೋಚನೆಯಿಂದ ರೂಪುತಳೆದಿದೆ. ಇದು ಒಂದು ನವೀನ ಮಾದರಿಯ, ಶ್ರೀಮಂತ ಥೀಮ್ ಪಾರ್ಕ್ ಆಗಿದೆ. ವಿಜ್ಞಾನದಲ್ಲಿ ಆಸಕ್ತಿ ಮೂಡಿಸುವ ಸಲುವಾಗಿ ಹಾಗು ವಿಙ್ಞಾನವನ್ನು ಆಟವಾಡುತ್ತ, ಅನೌಪಚಾರಿಕವಾಗಿ ಕಲಿಸುವ ಸಲುವಾಗಿ ಈ ವಿಜ್ಞಾನ ಕೇಂದ್ರವನ್ನು ಸರ್ಕಾರವು ಸ್ಥಾಪಿಸಿದೆ. ನಾಗಾಲ್ಯಾಂಡ್ ವಿಜ್ಞಾನ ಕೇಂದ್ರದಲ್ಲಿ ಹಲವಾರು ಗ್ಯಾಲರಿಗಳು ಇವೆ. ಇವುಗಳನ್ನು ವಿವಿಧ ವಿಭಾಗಗಳಾಗಿ ವಿಂಗಡಿಸಲಾಗಿದೆ. ಉದಾಹರಣೆಗೆ " ನಮ್ಮ ಜ್ಞಾನೇಂದ್ರಿಯಗಳು" , "ಫನ್ ಸೈನ್ಸ್" , " ಚಿಲ್ಡ್ರನ್ಸ್ ಕಾರ್ನರ್" ಎಂಬ ವಿವಿಧ ಬಗೆಯ ಗ್ಯಾಲರಿಗಳು ಇಲ್ಲಿವೆ. ಇವುಗಳ ಜೊತೆಗೆ ಇಲ್ಲಿ ಒಂದು ತಾರಾಲಯವನ್ನು ಸಹ ಸ್ಥಾಪಿಸಲಾಗಿದೆ. ಇದು ರಾತ್ರಿಯ ಆಕಾಶವನ್ನು ಅದ್ಭುತವಾಗಿ ವೀಕ್ಷಕರ ಮುಂದೆ ತೆರೆದಿಡುತ್ತದೆ.
ತಾರಾಮಂಡಲ್ ಎಂಬ ಮತ್ತೊಂದು ಪ್ರಸಿದ್ಧ ಸ್ಥಳವು ಈ ಕೇಂದ್ರದಲ್ಲಿದೆ. ಇದು ಅನುಪಮವಾದ ಗುಮ್ಮಟವನ್ನು ಹೊಂದಿದೆ. ಹೊರಾಂಗಣದಲ್ಲಿ ನೆಲೆಗೊಂಡಿರುವ ಈ ಬಯಲು ವಿಙ್ಞಾನ ಕೇಂದ್ರದಲ್ಲಿ ಹಲವಾರು ವೈಜ್ಞಾನಿಕ ಉಪಕರಣಗಳು ಇವೆ. ಈ ಉಪಕರಣಗಳು ಮನೋರಂಜನೆಯ ಜೊತೆಗೆ ಅತ್ಯಂತ ಸರಳವಾಗಿ ವಿಜ್ಞಾನದ ಮಾಹಿತಿಯನ್ನು ನೋಡುಗರಿಗೆ ಒದಗಿಸುತ್ತವೆ.
ಈ ಕೇಂದ್ರವು ಪ್ರತಿದಿನ ( ಸೋಮವಾರ ಹೊರತುಪಡಿಸಿ) ಬೆಳಗ್ಗೆ 10 ರಿಂದ 4 ಗಂಟೆಯವರೆಗೆ ತೆರೆದಿರುತ್ತದೆ. ಪ್ರವಾಸಿಗರು ನಾಗಾಲ್ಯಾಂಡ್ ವಿಜ್ಞಾನ ಕೇಂದ್ರಕ್ಕೆ ಭೇಟಿ ನೀಡಿ ಇಡೀ ದಿನ ಪೂರ್ತಿ ಹಲವಾರು ಉಪಕರಣಗಳನ್ನು ನೋಡಿ, ಅವುಗಳ ಬಗ್ಗೆ ತಿಳಿದುಕೊಳ್ಳಬಹುದು.