ಡಾಲ್ಹೌಸಿಯಿಂದ ಕೇವಲ ಒಂದು ಕಿ.ಮೀ. ದೂರದಲ್ಲಿದೆ ಸುಭಾಷ್ ಬಾವೋಲಿ. ಭಾರತೀಯ ಸ್ವತಂತ್ರ ಸೇನಾನಿ ಸುಭಾಷ್ಚಂದ್ರ ಭೋಸ್ ಅವರಿಂದಾಗಿ ಈ ಹೆಸರು ಇದಕ್ಕೆ ಬಂದಿದೆ. 1937ರಲ್ಲಿ ಸುಭಾಷ್ಚಂದ್ರರು ಡಾಲ್ಹೌಸಿಗೆ ಬಂದಿದ್ದರು. ಆಗ ಇವರ ಆರೋಗ್ಯ ಹದಗೆಟ್ಟಿತ್ತು. ವಿಶ್ರಾಂತಿಗಾಗಿ ಬಂದವರು ಏಳು ತಿಂಗಳು ಇಲ್ಲೇ ಚಿಕಿತ್ಸೆ ಪಡೆದಿದ್ದರು. ಈ ಭಾಗದಲ್ಲಿರುವ ತೊರೆಯ ನೀರಲ್ಲಿ ಔಷಧಿ ಗುಣವಿದೆ ಎಂದು ನಂಬಲಾಗಿದ್ದರಿಂದ ಅದನ್ನು ಸೇವಿಸಿಯೇ ಅವರು ಗುಣಮುಖರಾದರು ಎನ್ನಲಾಗುತ್ತದೆ. ಇದರಿಂದ ಈ ಸುಂದರ ತಾಣದ ವೀಕ್ಷಣೆಗೆ ಅಪಾರ ಸಂಖ್ಯೆಯಲ್ಲಿ ಜನ ಆಗಮಿಸುತ್ತಾರೆ.
ಇಲ್ಲೊಂದು ಕೆರೆಯಿದ್ದು ಇದರ ಪಕ್ಕದಲ್ಲೇ ಒಂದು ಜಲಪಾತ ಇದೆ. ಇದು ಈ ಸ್ಥಳದ ಆಕರ್ಷಣೆಯನ್ನು ಇನ್ನಷ್ಟು ಹೆಚ್ಚಿಸಿದೆ. ಅತ್ಯದ್ಭುತ ಕಾಡನ್ನು ಹೊಂದಿರುವ ಈ ಪ್ರದೇಶದ ನೀರು ಕೂಡ ಅತ್ಯಂತ ಶುದ್ಧವಾಗಿದೆ. ಪಾರದರ್ಶಕ ನೀರಿನ ನೋಟ ಎಲ್ಲರ ಗಮನ ಸೆಳೆಯುತ್ತದೆ. ಇಲ್ಲೇ ಒಂದು ಚಹದಂಗಡಿ ಇದ್ದು, ಸ್ಥಳೀಯ ಕುರುಕಲು ತಿಂಡಿ ಸಿಗುತ್ತದೆ. ಇದರೊಂದಿಗೆ ಕಳೆಯುವ ಸಮಯ ಅದ್ಭುತ ಅನುಭವ ತಂದುಕೊಡುತ್ತದೆ.