ಪಟ್ಟೀಸ್ವರರ್ ದೇವಾಲಯವು ಶಿವನ ದೇವಾಲಯವಾಗಿದ್ದು, ಕೊಯಮತ್ತೂರಿನ ಸಮೀಪದ ಪೆರೂರಿನಲ್ಲಿ ನೆಲೆಗೊಂಡಿದೆ. ಇಲ್ಲಿ ಶಿವನನ್ನು "ಪಟ್ಟೀಸ್ವರರ್ " ಎಂಬ ಹೆಸರಿನಿಂದ ಪೂಜಿಸಲಾಗುತ್ತದೆ. ಜೊತೆಗೆ ಈ ದೇವಾಲಯದಲ್ಲಿ ಶಿವನ ಅರ್ಧಾಂಗಿಯಾದ ಪಾರ್ವತಿದೇವಿಯನ್ನು ಸಹ ಪೂಜಿಸಲಾಗುತ್ತದೆ.
ಈ ದೇವಾಲಯವು ನೊಯ್ಯಲ್ ನದಿಯಿಂದ 7 ಕಿ.ಮೀ ದೂರದಲ್ಲಿ, ನದಿಯ ಪಶ್ಚಿಮ ಭಾಗದಲ್ಲಿ ನೆಲೆಸಿದೆ. ಕೊಂಗು ವೆಟ್ಟುವ ಗೌಂಡರ್ ಸಮುದಾಯಕ್ಕೆ ಸೇರಿದ ಪಲ್ಲಯಕರರ್ ರಾಜರು ಈ ದೇವಾಲಯವನ್ನು ನಿರ್ಮಿಸಿದರು. ಇದು ಕೊಯಮತ್ತೂರಿನ ಅತ್ಯಂತ ಪ್ರಮುಖ ದೇವಾಲಯವಾಗಿದೆ. ಸ್ಥಳೀಯವಾಗಿ ಈ ದೇವಾಲಯ ಅತ್ಯಂತ ಪ್ರಾಮುಖ್ಯತೆಯನ್ನು ಪಡೆಯಲು ಕಾರಣವೇನೆಂದರೆ, ಕೊಯಮತ್ತೂರಿನ ಬಹುತೇಕ ಮಂದಿ ಶಿವನ ಆರಾಧಕರು. ಈ ದೇವಾಲಯದ ಆವರಣದಲ್ಲಿರುವ ಬೃಹತ್ ವಿಗ್ರಹಗಳನ್ನು ನೋಡುವ ಸಲುವಾಗಿ ಪ್ರವಾಸಿಗರು ಇಲ್ಲಿಗೆ ಬರುತ್ತಿರುತ್ತಾರೆ.
ಈ ದೇವಾಲಯವು ಕೇವಲ ಧಾರ್ಮಿಕ ಮಹತ್ವವನ್ನಷ್ಟೇ ಅಲ್ಲದೆ ಐತಿಹಾಸಿಕ ಮಹತ್ವವನ್ನು ಸಹ ಹೊಂದಿದೆ. ಕಾಚಿಯಪ್ಪ ಮುನಿವರ್ ಮತ್ತು ಅರುಣಗಿರಿ ನಾಥರ್ ಅವರ ಸಾಹಿತ್ಯದಲ್ಲಿ ಈ ದೇವಾಲಯದ ಉಲ್ಲೇಖಗಳು ಕಂಡು ಬರುತ್ತವೆ.