ಚಂಬಲ್ ವನ್ಯಧಾಮವನ್ನು ಸುತ್ತಾಡಲು ಹಲವಾರು ಮಾರ್ಗೋಪಾಯಗಳಿವೆ. ಅದಕ್ಕಾಗಿ ನೀವು ಒಂಟೆ ಅಥವಾ ಜೀಪ್ ಸಫಾರಿಯ ಆಯ್ಕೆಯನ್ನು ಮಾಡಿಕೊಳ್ಳಬಹುದು. ಜೀಪ್ ಸಫಾರಿಯು ನಿಮ್ಮನ್ನು ಅಡ್ಡಾ-ದಿಡ್ಡಿಯಾಗಿ ಸಾಗುವ ಕೊರಕಲುಗಳ ರಸ್ತೆ, ನದಿ ದಂಡೆಗಳು, ಪೊದೆಗಳು, ಹಳ್ಳಿಗಳು ಹಾಗು ಕೋಟೆ ಮತ್ತು ಕಾಡು ಹಾದಿಯಲ್ಲಿ ಕರೆದೊಯ್ಯುತ್ತದೆ.
ಈ ಜೀಪ್ ಸಫಾರಿಯಲ್ಲಿ ನೀವು ನದಿಯಲ್ಲಿ ವಿಹರಿಸುತ್ತಿರುವ ಮೊಸಳೆಗಳನ್ನು, ಗಾಂಗೇಟಿಕ್ ಡಾಲ್ಫಿನ್ಗಳನ್ನು ನೋಡುವ ಅವಕಾಶ ಸಿಗುತ್ತದೆ. ಅಲ್ಲದೆ ಈ ವನ್ಯಧಾಮವು 300ಕ್ಕೂ ಅಧಿಕ ಸಂಖ್ಯೆಯ ದೇಶೀಯ ಮತ್ತು ವಿದೇಶೀಯ ವಲಸೆ ಪಕ್ಷಿಗಳಿಗೆ ಆಶ್ರಯವನ್ನೊದಗಿಸಿರುತ್ತದೆ. ಇದು ಪ್ರತಿ ವರ್ಷವು ಹೆಚ್ಚಾಗುತ್ತಲೇ ಇದೆ. ಉನ್ನತ ಹಿಮಾಲಯ ಮತ್ತು ಆರ್ಕಟಿಕ್ ಪ್ರಾಂತ್ಯದ ಪಕ್ಷಿಗಳು ಸಹ ಇಲ್ಲಿಗೆ ವಲಸೆ ಬರುತ್ತಿರುತ್ತವೆ. ಹಾಗಾಗಿ ಈ ವನ್ಯಧಾಮವನ್ನು IN 122 ಎಂಬ ಪ್ರಮುಖ ಪಕ್ಷಿ ಪ್ರದೇಶವಾಗಿ ಗುರುತಿಸಲಾಗಿದೆ.
ಇದರ ಜೊತೆಗೆ ಜೀಪ್ ಸಫಾರಿಯು ನಿಮ್ಮನ್ನು ಯಮುನಾ ನದಿ ತೀರದಲ್ಲಿರುವ ಬತೇಶ್ವರದಲ್ಲಿರುವ ಪ್ರಾಚೀನ ದೇವಾಲಯ ಸಂಕೀರ್ಣಕ್ಕು ಕೊಂಡೊಯ್ಯುತ್ತದೆ. ಇಲ್ಲಿ ಶಿವನಿಗಾಗಿ ನಿರ್ಮಿಸಲಾದ ನೂರಕ್ಕು ಅಧಿಕ ದೇವಾಲಯಗಳನ್ನು ನಾವು ಕಾಣಬಹುದು.