ಬಿಜು ಪಟ್ನಾಯಕ್ ಉದ್ಯಾನವನವು ಒಂದು ಅದ್ಭುತವಾದ ಉದ್ಯಾನವನವಾಗಿದೆ. ಈ ಉದ್ಯಾನವನವು ಬೆಹ್ರಾಂಪುರದಲ್ಲಿರುವ ವಿಶ್ವ ಸಂಸ್ಥೆಯ ಕಚೇರಿಯ ಪಕ್ಕದಲ್ಲಿಯೇ ನೆಲೆಗೊಂಡಿದೆ. ಇದರ ಜೊತೆಗೆ ಉದ್ಯಾನವನಕ್ಕೆ ಹೊಂದಿಕೊಂಡಂತೆ ಬ್ರಿಟೀಷ್ ಸರ್ಕಾರದ ಡಿಎಫ್ಐಡಿ ಕಚೇರಿ ಸಹ ಇದೆ. ಈ ಉದ್ಯಾನವನವನ್ನು ಒಡಿಶಾದ ಮುಖ್ಯಮಂತ್ರಿಯವರಾದ ಬಿಜು ಪಟ್ನಾಯಕ್ರವರಿಗೆ ಗೌರವ ಸಲ್ಲಿಸುವ ಸಲುವಾಗಿ ನಿರ್ಮಾಣ ಮಾಡಲಾಯಿತು. ಅದಕ್ಕಾಗಿ ಅವರ ಹೆಸರನ್ನು ಇದಕ್ಕೆ ಇಡಲಾಗಿದೆ.
ಈ ಉದ್ಯಾನವನದ ಸೌಂದರ್ಯವು ಇಲ್ಲಿನ ಗಿಡಗಳು ಮತ್ತು ಅವುಗಳಲ್ಲಿ ಅರಳಿರುವ ಹೂವುಗಳಿಂದ ಮತ್ತಷ್ಟು ಇಮ್ಮಡಿಗೊಳ್ಳುತ್ತದೆ. ಇಲ್ಲಿ ವಿಶ್ರಾಂತಿ ಪಡೆಯಲು ಬರುವವರ ಮೈ ಮನಗಳು ಇದರಿಂದ ಪುಲಕಗೊಳ್ಳುತ್ತವೆ. ಏಳು ಎಕರೆಗಳಷ್ಟು ವಿಶಾಲವಾದ ಪ್ರದೇಶದಲ್ಲಿ ನೆಲೆಗೊಂಡಿರುವ ಈ ಉದ್ಯಾನವನದಲ್ಲಿ ಬೆಟ್ಟವನ್ನು ಹೋಲುವ ಪ್ರತಿಕೃತಿಗಳು ಮತ್ತು ಸಂಗೀತಕ್ಕೆ ತಕ್ಕಂತೆ ಕುಣಿಯುವ ಕಾರಂಜಿಗಳು ಗಮನ ಸೆಳೆಯುತ್ತವೆ. ಇಲ್ಲಿ ದೋಣಿಯಾನಕ್ಕು ಸಹ ಅವಕಾಶವನ್ನು ನೀಡಲಾಗಿದೆ. ಪ್ರವಾಸಿಗರು ಇಲ್ಲಿನ ಸುಂದರವಾದ ಪರಿಸರದಲ್ಲಿ ದೋಣಿ ಯಾನದ ಮೋಜನ್ನು ಸವಿಯಬಹುದು. ಹೊನಲು ಬೆಳಕಿನ ವ್ಯವಸ್ಥೆಯನ್ನು ಹೊಂದಿರುವ ಈ ಉದ್ಯಾನವನಕ್ಕೆ ಪ್ರವಾಸಿಗರು ಹಗಲು ಮತ್ತು ರಾತ್ರಿ ಎರಡು ಸಮಯದಲ್ಲಿ ಸಹ ಭೇಟಿ ನೀಡಬಹುದು.