ಸಂಗ್ಡ ಜಲಪಾತವು ಅರಕು ಕಣಿವೆಯ ಒಂದು ಭಾಗವಾಗಿದ್ದು, ಪೂರ್ವ ಘಟ್ಟಗಳ ಸುಂದರ ಬೆಟ್ಟದ ಮೇಲೆ ನೆಲೆಗೊಂಡಿದೆ. ಈ ಜಲಪಾತವು ಸಂಗ್ಡ ಎಂಬ ಹಳ್ಳಿಗೆ ಅತ್ಯಂತ ಸಮೀಪದಲ್ಲಿದೆ. ಹಾಗಾಗಿ ಈ ಹೆಸರು ಈ ಜಲಪಾತಕ್ಕೆ ಬಂದಿದೆ. ತನ್ನ ಸುತ್ತಮುತ್ತಲ ಪ್ರದೇಶ ಮತ್ತು ಅದ್ಭುತವಾದ ಸ್ಥಳೀಯ ಜನರಿಂದಾಗಿ ಈ ಜಲಪಾತವು ಅತ್ಯಂತ ಪ್ರಸಿದ್ಧ ಆಕರ್ಷಣೆಗಳಲ್ಲಿ ಒಂದಾಗಿದೆ.
ಈ ಜಲಪಾತವು ದಟ್ಟಡವಿಯ ನಡುವೆ ನೆಲೆಗೊಂಡಿದೆ. ಈ ಅಡವಿಯ ಶಾಂತಿಯನ್ನು ಕದಡುವ ಒಂದೇ ಒಂದು ಅಂಶವೆಂದರೆ ಅದು ಈ ಜಲಪಾತ ಭೋರ್ಗರೆಯುವ ಸದ್ದು. ಹಲವು ಪ್ರವಾಸಿಗರು ಮತ್ತು ಸ್ಥಳೀಯರು ಈ ಜಲಪಾತವನ್ನು ನೋಡಲು ಆಗಮಿಸುತ್ತಿರುತ್ತಾರೆ. ಈ ಜಲಪಾತವು ಎಲ್ಲರ ನೆಚ್ಚಿನ ವಿಹಾರ ತಾಣವಾಗಿದೆ. ಈ ಜಲಪಾತದಲ್ಲಿ ಆಟವಾಡುತ್ತ ಪರಿಸರದೊಂದಿಗೆ ಕಾಲ ಕಳೆಯುವ ಸಲುವಾಗಿ ಹಲವರು ತಮ್ಮ ಕುಟುಂಬ ಮತ್ತು ಸ್ನೇಹಿತರ ಜೊತೆಗೆ ಇಲ್ಲಿಗೆ ಆಗಮಿಸುತ್ತಿರುತ್ತಾರೆ.
ಈ ಜಲಪಾತಕ್ಕೆ ರಸ್ತೆಯ ಮೂಲಕ ಸುಲಭವಾಗಿ ತಲುಪಬಹುದು. ಹಳ್ಳಿಯ ಮೂಲಕ ಸಾಗುವ ಹಳ್ಳ ದಿಣ್ಣೆಗಳ ರಸ್ತೆಯು ನಿಮ್ಮನ್ನು ಜಲಪಾತದ ಬಳಿಗೆ ಕರೆದೊಯ್ಯುತ್ತದೆ. ಬಹುದೂರದಿಂದಲೆ ನೀವು ಜಲಪಾತ ಭೋರ್ಗರೆಯುವ ಸದ್ದನ್ನು ಕೇಳಬಹುದು. ಆ ಸದ್ದು ಕೇಳಿದ ಕೆಲ ಕ್ಷಣಗಳ ನಂತರ ನಿಮಗೆ ಜಲಪಾತವು ಕಾಣಸಿಗುತ್ತದೆ.