ನಾಗ್‍ಬಾಲ್ ಎಂಬುದು ಅನಂತ್‍ನಾಗ್ ಜಿಲ್ಲೆಯಲ್ಲಿರುವ ಒಂದು ಪ್ರಮುಖ ಹಿಂದೂ ಯಾತ್ರಾ ಸ್ಥಳವಾಗಿದೆ. ಈ ಸ್ಥಳಕ್ಕೆ ಭೇಟಿಕೊಟ್ಟಾಗ ಪ್ರವಾಸಿಗರು ಬೆಟ್ಟದ ಬುಡದಲ್ಲಿ ಉಕ್ಕಿ ಹರಿಯುವ ಒಂದು ಝರಿಯನ್ನು ಕಾಣಬಹುದು. ಈ ಝರಿಯು ಅನಂತ ಎಂದು ಕರೆಯಲ್ಪಡುವ ವಿಷ್ಟುವಿನ ಆರಾಧಿಸುವ ಸ್ಥಳವಾಗಿ ಖ್ಯಾತಿಪಡೆದಿದೆ. ಪ್ರವಾಸಿಗರು ನಾಗ್‍ಬಾಲ್ ಸಂಕೀರ್ಣದ ಒಳಗೆ ಹಳೆಯ ಚಿನಾರ್ ಗಳನ್ನು ಹೊಂದಿರುವ ಒಂದು ದೊಡ್ಡ ಕಲ್ಯಾಣಿಯನ್ನು ನೋಡಬಹುದು. ಈ ಕಲ್ಯಾಣಿಯ ಒಳಗಡೆ ಇರುವ ಮೀನುಗಳನ್ನು ಅತ್ಯಂತ ಪವಿತ್ರವಾದವುಗಳೆಂದು ಭಾವಿಸಲಾಗಿದೆ.

ಈ ಪವಿತ್ರ ಝರಿಯ ಪಕ್ಕದಲ್ಲಿ ಒಂದು ಪಾಳು ಬಿದ್ದ ಸಣ್ಣ ದೇವಾಲಯವನ್ನು ನಾವು ನೋಡಬಹುದು. ಈ ದೇವಾಲಯವನ್ನು ಕಾಶ್ಮೀರದಲ್ಲಿ ಆಳಿದ ಡೊಗ್ರ ಮನೆತನದ ಮಹಾರಾಜ ರಣಬೀರ್ ಸಿಂಗ್‍ನ ಅವಧಿಯಲ್ಲಿ ನಿರ್ಮಿಸಲಾಯಿತು. ಆದರೆ ಈ ದೇವಾಲಯವು ಪ್ರಸ್ತುತ ಶಿಥಿಲಾವಸ್ಥೆಯಲ್ಲಿದೆ. ಯಾತ್ರಾರ್ಥಿಗಳು ಇಲ್ಲಿ ಅನಂತ ಭಗವಾನ್ ಮೂರ್ತಿಯನ್ನು ನೋಡಬಹುದು.

ಶಿವಜೀ ದೇವಾಲಯವು ನಾಗ್‍ಬಾಲ್ ಸಂಕೀರ್ಣದಲ್ಲಿರುವ ಮತ್ತೊಂದು ಧಾರ್ಮಿಕ ಕೇಂದ್ರವಾಗಿದೆ. ಈ ಯಾತ್ರಾಸ್ಥಳವು ಈ ಸಂಕೀರ್ಣದಲ್ಲಿರುವ ಅತ್ಯಂತ ಹಳೆಯ ದೇವಾಲಯವಾಗಿದೆ. ಇದನ್ನು ಮಹಾರಾಜ ಪ್ರತಾಪ್ ಸಿಂಗ್‍ರವರ ಆಡಳಿತಾವಧಿಯಲ್ಲಿ ಅಂದರೆ,1885 ಮತ್ತು 1925 ರ ನಡುವೆ ನಿರ್ಮಿಸಲಾಯಿತು. ಹಿಂದೂ ಧಾರ್ಮಿಕ ಕೇಂದ್ರಗಳ ಹೊರತಾಗಿ ಇಲ್ಲಿ ಒಂದು ಗುರುದ್ವಾರ ಸಹ ಇದೆ. ಈ ಸ್ಥಳದಲ್ಲಿ ಒಂದು ಗಂಧಕದ ಚಿಲುಮೆ ಸಹ ಉಕ್ಕಿ ಹರಿಯುತ್ತದೆ. ಇದು ಎಲ್ಲ ತರಹದ ಚರ್ಮ ವ್ಯಾಧಿಗಳನ್ನು ನಿವಾರಿಸುವ ಗುಣವನ್ನು ಹೊಂದಿದೆ ಎಂದು ನಂಬಲಾಗುತ್ತದೆ.