ಲಡಾಖ್ ಜಿಲ್ಲೆಯ ಲೇಹ್ ನಲ್ಲಿ ನೆಲೆಗೊಂಡಿರುವ ಜನಪ್ರಿಯ ಹಳ್ಳಿಯೇ ಅಲ್ಚಿ. ಇಂಡಸ್ ನದಿಯ ತಟದಲ್ಲಿ ನೆಲೆಸಿರುವ ಈ ಪ್ರಶಾಂತ ಹಳ್ಳಿಯು ಹಿಮಾಲಯ ಕೇಂದ್ರ ಪ್ರದೇಶದ ಲೇಹ್ ನಿಂದ 70 ಕಿ.ಮೀ ದೂರದಲ್ಲಿದೆ.

ತನ್ನಲ್ಲಿರುವ ಅಲ್ಚಿ ಎಂಬ ಹೆಸರಿನ ಮೊನಾಸ್ಟರಿ(ಮಠ)ಯಿಂದಲೆ ಈ ಹಳ್ಳಿಯು ಜನಪ್ರಿಯವಾಗಿದೆ. ಅಲ್ಚಿ ಮೊನಾಸ್ಟರಿಯು ಲಡಾಖ್ ನ ಪ್ರಖ್ಯಾತ ಆಕರ್ಷಣೆಗಳಲ್ಲಿ ಒಂದಾಗಿದೆ. ಸಾಮಾನ್ಯವಾಗಿ ಲಡಾಖ್ ನಲ್ಲಿರುವ ಇತರೆ ಮಠಗಳು ಪರ್ವತಗಳ ತುದಿಗಳಲ್ಲಿ ನೆಲೆಸಿದ್ದರೆ, ಅಲ್ಚಿ ಮಠವು ಮಾತ್ರ ಪ್ರದೇಶದ ಕೆಳವಲಯದಲ್ಲಿ ನಿರ್ಮಿತವಾಗಿದೆ. ಅನನ್ಯವಾದ ವಾಸ್ತುಶಿಲ್ಪ ಶೈಲಿಯನ್ನು ಹೊಂದಿರುವ ಈ ಮಠದ ಇತಿಹಾಸವು 11 ನೇ ಶತಮಾನಕ್ಕೆ ಕೊಂಡೊಯ್ಯುತ್ತದೆ. ಈ ಮಠದ ಕಟ್ಟಡವು ಮೂರು ಪ್ರಮುಖ ದೇವಾಲಯಗಳನ್ನು ಒಳಗೊಂಡಿದ್ದು, ಅವುಗಳೆಂದರೆ ಡು-ಖಂಗ್, ಸುಮ್-ಸೆಕ್ ಮತ್ತು ಮಂಜುಶ್ರಿ ದೇವಾಲಯ. ಈ ದೇವಾಲಯಗಳ ಗೋಡೆಗಳ ಮೇಲೆ ಬುದ್ಧ ಹಾಗು ಇತರೆ ದೇವತೆಗಳ ಸುಂದರ ವರ್ಣಚಿತ್ರಗಳನ್ನು ಕಾಣಬಹುದಾಗಿದೆ.

ಪ್ರಾಕೃತಿಕ ಸೊಬಗಿನ ಮಡಿಲಲ್ಲಿ ಸ್ಥಿತಗೊಂಡಿರುವ ಅಲ್ಚಿಯು, ಭೇಟಿ ನೀಡುವ ಪ್ರವಾಸಿಗರಿಗೆ ಒಂದು ವಿಹಂಗಮವಾದ ನೈಸರ್ಗಿಕ ನೋಟವನ್ನು ಒದಗಿಸುತ್ತದೆ. ಈ ಒಂದು ಸ್ಥಳದಲ್ಲಿ ಪ್ರವಾಸಿಗರು ಮಠಗಳ ಜೀವನ ಶೈಲಿಯನ್ನು ಅತಿ ಹತ್ತಿರದಿಂದ ಗಮನಿಸಬಹುದು. ವಾಸ್ತವ್ಯಕ್ಕೂ ಕೂಡ ಇಲ್ಲಿ ಸೌಲಭ್ಯಗಳಿವೆ.

ಈ ಪ್ರದೇಶಕ್ಕೆ ವಿಮಾನಗಳ ಮೂಲಕವು ತಲುಪಬಹುದು. ಇದಕ್ಕೆ ಹತ್ತಿರದಲ್ಲಿರುವ ವಾಯುನೆಲೆಯೆಂದರೆ ಲೇಹ್. ಇಲ್ಲಿರುವ ವಿಮಾನ ನಿಲ್ದಾಣವು ಭಾರತದ ಪ್ರಮುಖ ನಗರಗಳಾದ ಪುಣೆ, ದೆಹಲಿ, ಜಮ್ಮು ಮತ್ತು ಶ್ರೀನಗರಗಳೊಂದಿಗೆ ಉತ್ತಮ ವೈಮಾನಿಕ ಸಂಪರ್ಕವನ್ನು ಹೊಂದಿದೆ. ಇನ್ನು ಹತ್ತಿರದ ರೈಲು ತುದಗಳೆಂದರೆ, ಪಠಾನ್ಕೋಟ್ ಮತ್ತು ಚಂಡೀಗಡ್.

ಅಲ್ಚಿ ಗ್ರಾಮವು ವಿಪರೀತವಾದ ಹವಾಮಾನ ಗುಣಲಕ್ಷಣಗಳನ್ನು ಹೊಂದಿದೆ. ಚಳಿಗಾಲದಲ್ಲಿ ಮೈಕೊರೆಯುವಂತಹ ಚಳಿ ಇಲ್ಲಿದ್ದು, ಬೇಸಿಗೆಯು ಆರಾಮದಾಯಕವಾಗಿರುತ್ತದೆ. ವರ್ಷಪೂರ್ತಿ ಮಳೆಯನ್ನು ಅನುಭವಿಸುವ ಈ ಪ್ರದೇಶವು ಬೇಸಿಗೆಯ ಸಂದರ್ಭದಲ್ಲಿ ಅದರಲ್ಲೂ ವಿಶೆಷವಾಗಿ ರಾತ್ರಿ ಹೊತ್ತಿನಲ್ಲಿ ತಾಪಮಾನದಲ್ಲಿ ಕುಸಿತವನ್ನು ಕಾಣುತ್ತಿರುತ್ತದೆ. ಅಲ್ಚಿಗೆ ಭೇಟಿ ನೀಡಲು ಉತ್ತಮ ಸಮಯವೆಂದರೆ ಜೂನ್ ಮತ್ತು ಸೆಪ್ಟಂಬರ್ ತಿಂಗಳುಗಳ ಮಧ್ಯದ ಅವಧಿ.